انت خاين

 

 

انت خاين
انت خاين لو بتكتب شعر
او رواية او مقالة
او رسالة
والكلمة حسب الاتفاق والسعر
شكر ومديح للنجمة أو للنسر
خلصونا من الحثالة
بعد ما هتفنا الهتاف
عيش وحرية وعدالة
طب افتكر تاني الهتاف
الام قتلت ابنها لما طلب عيش بس حاف
والحبس مليان بالآلاف
لو ابن عمك ليه زميل في الشغل صاحب ابنه في الائتلاف
يبقى اعدام ليك وليه من غير خلاف
شايل بطاقته فجيبك
خايف مالكماين
دبوسه عالشنطة معلقه وباين
وبتشتري دماغك حقك عليك هاين
يبقى مين فينا اللي خاين؟
انت اللي خاين
انت اللي خاين لو نزلت ايام يناير
ضد ظلم وحكم جائر
في الصفوف الأولى ثاير
بالصلح كافر
بالنصر ظافر
ضد الفحول
ويا الحيتان ويا الفلول
جاي دلوقتي تقول
عاوز اسافر
عاوز اهاجر
الثورة اصعب مما كنت فاكر
ياخي غور
وانسى انك يوم طالبت بحد ادنى للأجور
وانسى اللي عايشين في القبور
واما ترجع حتلاقيني برضه ثاير
انا ليا تار عند اصحاب القصور
الورد فتح في الصخور مش في الجناين
انت اللي خاين
واللي فوض واللي بايع
برضه خاين
واللي مع أو مش ممانع
برضه خاين
واللي عامل نفسه مش شايف وسامع
واللي قاصد يبقى مش شايف وسامع
واللي طبل في الجوامع
واللي سقف في الكنايس
والمسيس واللي بيحاول يسايس
واللي مالي قلوبنا بالخوف والهواجس
واللي خلاني أخون
حبيبتي
لما تبصلي وتسأل حتحميني؟
جوابي سكون
أنا وحدي مش موسى بس العدو فرعون
لكني مش ساكن
لا واهم ولا واهن
أنا الرجل الذي آمن
أنا يوسف المسجون
انا الغلام لما اتقتل، فالحق ماتهاون
ولا للمعتدي يهادن
ييقى مين فينا اللي خاين؟
انت اللي خاين
(ياسين الغنام)

Advertisements

A great man once said...

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s